Uppskot komið um eykaskatt á alivinnuna

Uppskot um eykaskattin á alifeløg er sent til hoyringar.

Skatturin er átta prosent og fer í landskassan.

26. mars gjørdu samgonguflokkarnir og Sambandsflokkurin semju um eina endurskoðaða skipan fyri gjøld frá alivinnuni. 

Teir vóru samdir um at gera eina tvíliðaða gjaldskipan fyri alivinnuna, tað er tøkugjald og eykaskattur á yvirskot hjá alifeløgunum.

Skotið verður upp, at alifeløgini gjalda eykaskatt, átta prosent, av tí partinum av skattskyldugu inntøkuni, sum stavar frá virkseminum, tað er frá smoltframleiðslu til sjógvaaling og tøku. 

Úrslitið hjá vinnuni er treytin fyri, hvussu nógv eykaskatturin gevur.

Er úrslitið ein milliard, verður eykaskatturin 80 mió. kr. um árið.

Fíggjarmálaráðið sigur, at tøkugjaldið minkar sannlíkt frá 2025.

Men eykaskatturin, sum verður álagdur fyri skattaárið 2025, verður goldin á sumri 2026.

Tí má roknast við minni inntøku til landskassan í 2025. 

Lógin kemur í gildi 1. januar 2025.