Magnus Powell verður nýggjur KÍ-venjari

Eftir ársskiftið tekur Magnus Powell, ið áður hevur vant 07Vestur, við sum venjari hjá besta mansliðnum hjá KÍ.

Hetta boðar KÍ frá á heimasíðu felagsins. 

Magnus Powell er 49 ár og hevur drúgvar royndir í svenskum og norskum fótbólti.

Síðstu 16 árini hevur hann verið venjari eina mest í næstbestu deildunum í Noreg og Svøríki, umframt at hann, sum kunnigt, í 2021 vandi 07Vestur.

Hevur royndirnar og førleikarnar

Tummas Lervig, formaður í KÍ, fegnast um, at tað hevur eydnast at fáa Magnus Powell at venja fótbóltsmenninar í felagnum. 

- Eftir tað var okkum greitt, at Espen Haug endar sítt starv nú í heyst, hava vit leitað eftir avloysara. Valið er fallið á Magnus Powell, sum vit halda hevur royndirnar og førleikarnar til at vera høvuðsvenjari hjá besta mansliðnum, men eisini at vera við í menningini av tí fótbóltsfakliga arbeiðinum í felagnum, sigur formaðurin,Tummas Lervig við KÍ-heimasíðuna.

Avtalan við Magnus Powell er fyribils galdandi fyri 2025 og 2026. Eftir ætlan kemur hann at vitja KÍ seinni í vikuni.

Sjálvur gleðir Magnus Powell seg at standa á odda fyri KÍ, ið hevur staðið seg so ómetaliga væl bæði her heima og úti í Evropa síðstu árini. 

- Hetta er ein avbjóðing, sum eg við eldhuga og eyðmýkt fari í holt við. Eg trívist væl millum føroyingar, og KÍ er eitt toppfelag, sum eg veit setir høg krøv, bæði viðvíkjandi úrsliti og góðsku á vøllinum, sigur Magnus Powell, komandi KÍ-venjari.