Telduálopið í Klaksvík: Heita á borgarar um at vera varnar

Klaksvíkar kommuna, Norðoya bú- og heimatænasta og Barnaverndartænastan í Norðoyggjum hava nú sent út eina fráboðan um trygdarbrot.

Tey siga, at tey hava aftur ræði á øllum upplýsingunum, sum teldusníkar tóku, men tey kunnu ikki við vissu siga, at teldusníkarnir ikki hava tikið avrit av upplýsingunum.

Upplýsingarnar eru navn, bústaður, p-tal, kontunummur, yrkisfelagsligt tilknýti og persónupplýsingar í sambandi við málsviðgerðir.

Talan kann eisini vera um skrásetingar hjá barnatannlækna í Klaksvíkar kommunu, Fugloyar kommuna, Hvannasunds kommunu, Kunoyar kommunu og Viðareiðis kommunu.

Tey, sum hava stolið upplýsingarnar, kunnu royna eitt nú nýta p-tal til samleikastuldur ella svik. Tey kunnu royna at lumpa fólk at veita upplýsingar ella pengar.

Varin við óvæntaðum teldupostum

Ráðini eru tí at vera varin, um fólk fáa óvæntaðar teldupostar, SMS-boð ella telefonuppringingar, har biðið verður um persónligar upplýsingar, innritanarupplýsingar ella pengar.

'Trýstið ikki á ivasamar leinkjur, og latið ikki persónupplýsingar til óviðkomandi' eru ráðini. 

'Og broytið veik loyniorð til sterk loyniorð'. 

Gjaldstovan hevur kunning um júst hetta, siga Klaksvíkar kommuna, Norðoya bú- og heimatænasta og Barnaverndartænastan í Norðoyggjum .

Tey siga eisini, at arbeitt verður av øllum alvi við at framtíðartryggja allar dátur.