Broytt uppseting krevur onga lógarbroyting um Búskapargrunnin

Broytta uppsetingin í Búskapargrunninum krevur ikki nakra broyting í lógini um grunnin.

Og flytingar í grunnin vera nú sjónligari í fíggjarlógini.

Tað sigur Ruth Vang, landsstýriskvinna, í svari til Helga Abrahamsen, løgtingsmann.

Broytta uppsetingin og mannagongdin gera, at tilfeingisinntøkur vera fluttar beinleiðis á høvuðskontuna fyri tilfeingisinntøkurnar undir tí, sum eitur RLÚ I. 

RLÚ I í fíggjarlógini umfatar vanligar inntøkur, útreiðslur og løgur.

Higartil eru allar flytingar millum fíggjarlógina og Búskapargrunnin gjørdar undir RLÚ II, sum eru serligar inntøkur, eisini tilfeingisinntøkur frá fiski- og alivinnuni.

Í nógv ár hava bæði landsstýrið og Búskaparráðið ásannað, at Búskapargrunnurin ikki í nóg stóran mun hevur havt ætlaða virknaðin ella uppmerksemið í politisku skipanini, sigur Ruth Vang.