Elon Musk letur milliónir til valstríðið hjá Donald Trump

Tøkni-milliardingurin Elon Musk hevur latið eina millión dollarar til ein amerikanskan mann, sum var við í einum tiltaki í valstríðnum í Harrisburg í statinum Pennsylvania í gjárkvøldið. 

Og soleiðis fer tað at vera hvønn dag, til amerikanska forsetavalið 5. november.

Endamálið við tiltakinum er at fáa fleiri atkvøður til republikanska forsetavalevnið, Donald Trump, skrivar Reuters.

Einasta kravið fyri at vera við í lutakastinum um stóru pengaupphæddina er, at tú skalt skriva undir áheitanina hjá Elon Musk á netinum at stuðla sokallaðu "first og second amendments" hjá USA.

Hetta eru grundlógarískoytini í amerikansku grundlógini, sum tryggja rættin til talufrælsi og rættin at bera vápn.

Latið hálva milliard í stuðulsgrunn

Elon Musk er farin upp í valstríðið av heilum huga fyri at fáa republikanska valevnið, fyrrverandi forsetan Donald Trump, valdan.

Mikudagin var kunngjørt, at Musk hevur latið umleið 75 milliónir dollarar - yvir hálva milliard krónur - til ein stuðulsgrunn, sum hann sjálvur hevur stovnað, ið skal hjálpa Donald Trump í valstríðnum.

Peningurin í grunninum er brúktur til at fáa Trump-viðhaldsfólk til valborðið í svingstatunum. 

Musk sigur, uttan at hava prógv fyri tí, at demokratarnir fara at royna at fylla USA við ólógligum tilflytarum, sum aftur fara at atkvøða fyri demokratunum í framtíðini. og harvið tryggja flokkinum æviga valdið í USA, sum hann málber seg.

Tí heldur hann, at valið 5. november kann verða tað seinasta frælsa valið í USA, um demokratiska valevnið Kamala Harris vinnur.