Bundesliga: Hákun omaná í føroyingauppgerð

Tað vóru Hákun West av Teigum og liðfelagarnir í Füchse Berlin, sum vunnu sannførandi á Eliasi Ellefsen á Skipagøtu og THW Kiel í Max-Schmeling-Halle seinnapartin.

Føroyski stjørnuvongurin skeyt trý mál í 35-26 heimasigrinum, meðan spælskiparin í svørtum og hvítum, sum tykist vera komin fyri seg eftir skaðan, sum hevur darvað í seinastuni, skoraði tvær ferðir fyri Kiel. 

Dysturin var javnur fyri steðgin, men í seinna hálvleiki fóru berlinrevarnir undan - sum ikki einaferð við Mathiasi Gidsel á odda. Danin skeyt níggju mál. 

Úrslitið hevði við sær, at Füchse Berlin nú er á 3. plássi í Bundesliguni við 14 stigum; eitt stig aftan fyri Vilhelm Poulsen og hinar í Hannover Burgdorf og tvey stig aftan fyri Melsungen. THW Kiel er á 6. plássi við 12 stigum.

Jóhan á Plógv Hansen og Flensburg eru á 8. plássi við 11 stigum.

Nú gongur leiðin hjá føroysku landsliðsspælarunum til Føroya, har venjing er á skránni áðrenn EM-undankappingardystin ímóti Kosovo mikudagin og Ukraina sunnudagin.