Eykajáttanarlóg: Brúk er fyri minni pengum

Endurgjald til skipasmíð er 1,5 mió. kr. minni enn metingin, sum er gjørd í sambandi við eykajáttanarumbønina, sum kom í september. 

Biðið var um 17,8 millónir krónur, men brúk er bara fyri 16,3 milliónum.

Í fíggjarlógini eru frammanundan 5,2 mió. kr.

Øll játtanin í ár er longu brúkt. Talan er um fýra verkætlanir. 

Størsta verkætlanin er frystitrolarin hjá P/f Hvanngarði, sum hevur søkt um 12,8 mió kr. í endurgjaldi. 

Níggju milliónir minni til Heilsutrygd

Og framrokningar hjá Heilsutrygd vístu fyrr í ár, at útreiðslurnar vera fimm mió. kr. minni enn játtað. 

Nýggj meting sigur nú, at játtanin kann minka fýra milliónir aftrat.

Játtanin minkar tí níggju milliónir krónur sambært broytingaruppskoti frá Fíggjarmálaráðnum.

Í vár var heilivágsnýtslan serliga stór. Tá var mett, at tann gongdin helt fram alt árið.

Og sjúklingaviðgerðir uttanlands kosta eina millión minni enn mett í september.

Biðið verður nú um fýra milliónir.

Og játtanin hjá Landssjúkrahúsinum til flutning og uppihald kann minka 1,6 mió. kr. niður í eina millión.