Bjarni Prior heldur fram

Nýggja býráðið í Vága kommunu, sum fevnir um bygdirnar Sandavág, Miðvág og Vatnsoyrar, skipaði seg á fundi fyrrapartin í gjár.

Borgarstjórin síðstu fýra árini, Bjarni Prior, ið fekk nógv flestar atkvøður á kommunuvalinum týsdagin, heldur fram sum borgarstjóri, og nýggjur varaborgarstjóri er Jóanis Albert Nielsen.

Hetta samtykti býráðið einmælt, áðrenn tær fýra føstu nevndirnar í býráðnum vórðu valdar.

Tær eru fíggjarevndin, tekniska nevnd, vinnu- og havnanevndin, og mentanar- og trivnaðarnevndin.

Eisini vóru tríggir býráðslimir vald í stýrið fyri Vesturvón, ein í nevndina fyri IRF, umframt tríggir limir í tilbúgvingarnevndin.

Umframt Bjarna Prior og Jóanis Albert Nielsen eru býráðslimirnir í Vága kommunu hetta komandi skeiðið Gunnvá á Lofti, Thilda Hansdóttir í Líðini, Súsanna Nordendal, Jónhard Selfoss, Ingi Wiberg, Elsibet Jacobsen, Beinta Gudmundsen, Albert Ellefsen og Dánial Hansen.