Katarina Jezic: - Lat bara bóltin fara í málið

Føroyingar sótu sum á nálum síðstu minuttirnar av søguliga javnleikinum ímóti Kroatia í gjár.

Pernille Brandenborg skeyt Føroyar framum, tá góðir fimm minuttir vóru eftir, og beint eftir javnaði Paula Posavec til 17-17. Síðstu fimm minuttirnir vóru merktir av nervum og misnýttum kjansum, og hvørki av liðunum megnaði at skora.

Kroatar høvdu tað eitt sindur á sama hátt sum føroyingarnir, segði strikuspælarin, Katarina Jezic.

 - Tað vóru so nógvir minuttir uttan mál yvirhøvur, og til endans hugsaði tú bara: "Lat bara bóltin fara í málið", og so verja vit fyri rest. Eg vildi bara hava sigurin, segði liðfelagin hjá Pernille Brandenborg í København Håndbold.

Klara Birtic var vónsvikin av, at tað ikki eydnaðist Kroatia at vinna dystin ímóti Føroyum.

 - Vit høvdu so nógvar møguleikar. Vit spældu gott í verjuni, men gjørdu ov nógv mistøk í álopsspælinum segði Klara Birtic, sum rósti báðum málverjunum fyri góðu avrikini.