Varðhald longt fyri drápsroynd og rúsevni

Varðhaldsfongslingin hjá einum manni, sum er skuldsettur fyri drápsroynd í Skálafirði 20. november, er longd fýra vikur.

Tað var gjørt í morgun uttan rættarfund, tí maðurin góðtók sjálvboðin, at varðhaldsfongslingin var longd.

Maðurin, sum er útlendingur, er skuldsettur fyri at stinga ein føroyskan mann í bringuna við knívi. 

Rúsevni við bátum

Føroya rættur hevur í dag longt varðhaldsfongslingina hjá fýra fólkum, sum eru skuldsett fyri at smugla 23 kilo av hassji og 3,8 kilo av amfetamini til Føroya. 

Tey komu á Havnina við seglbáti. Politiið tók tey 29. august.

Onnur kvinnan, hon er íslendsk, var latin leys í september.

Hini fýra eru tríggir danir og ein føroyingur.

Tveir teirra játtaði sjálvbodnir at sita fýra vikur aftrat í varðhaldi.
  
Hini bæði vóru í rættinum í morgun.

Úrskurðurin hjá rættinum um at leingja varðhaldið var skotin inn fyri Landsrættin.

Trý eru í varðhaldi í Danmark og ein í Mjørkadali.

Fyri einari viku síðani var varðhaldið longt hjá fimm monnum, sum eisini royndu at smugla rúsevni í báti.