Fiskimenn vilja ikki hava hægri pensjónsaldur

Pensjónsaldurin eigur ikki at hækka.

Tað heldur Føroya fiskimannafelag.

Felagið sigur í sínum hoyringarskrivi um ætlanina hjá landsstýrinum, at langt og hart arbeiðslív hava merkt nógvar fiskimenn.

Tí tekur Fiskimannafelagið ikki undir við, at pensjónsaldurin hækkar.

Og felagið heldur eisini, at pensjónistar eiga at sleppa at arbeiða, uttan at arbeiðsinntøkan verður mótroknað. 

Landsstýrið ætlar, at frá 1. januar 2035 til 1. januar 2042 skal pensjónsaldurin hækka úr 68 árum uppí 70 ár. Broytingin verður gjørd stigvíst, so at pensjónsaldurin hækkar tríggjar mánaðir um árið.

Tískil fer pensjónsaldurin at hækka munandi skjótari enn hann hevur gjørt. 

Hækkar so líðandi

1. juli í ár hækkaði hann seks mánaðir uppí 67 ár og seks mánaðir.

Næsta broyting verður 1. juli í 2030, tá pensjónsaldurin aftur hækkar seks mánaðir uppí 68 ár.

Síðani hendir einki fyrr enn í 2035, tá pensjónsaldurin aftur hækkar tríggjar mánaðir.

Endamálið við uppskotinum er at betra um haldførið í føroyska búskapinum.

Í lógaruppskotinum er eisini ásett, at løgtingið í 2030 skal taka støðu til, hvør pensjónsaldurin skal vera frá 1. januar 2043.

Hoyringarfreistin var til 4. desember.