Óvissa um vápnahvíld millum Ísrael og Hamas

Óvissa er framvegis um vápnahvíldina millum Ísrael og Hamas, sum kom í lag í gjár, eftir at ísraelski forsætisráðharrin Benjamin Netanyahu í morgun útsetti ein fund hjá ísraelsku stjórnini um at viðurkenna avtaluna.

Netanyahu sigur, at Hamas roynir at broyta avtaluna, sum semja var um í gjár, og tí er stjórnarfundurin fyribils útsettur.

Ein týðandi partur av semjuni er, at Hamas skal lata 33 ísraelskar gíslar leysar, og afturfyri skal Ísrael lata leysar eitt enn ókent tal av palestinum, sum sita í ísraelskum varðhaldi.

BBC heldur seg vita, at Hamas nú hevur lagt tvey nøvn aftrat listanum av palestinskum fangum, sum felagsskapurin vil hava Ísrael at lata leysar. Hesi nøvnini vóru ikki partur av upprunaligu avtaluni. 

Hamas sigur, at tað ikki er rætt, sum Benjamin Netanyahu sigur. Hamas kennir seg bundið av avtaluni, sum bleiv gjørd í gjár, og roynir ikki at broyta hana nú.

Samrøða verður Petur Petersen, sendimann Føroya í Ísrael, í útvarpstíðindunum klokkan 12.20.