Múte B. Egede: Vilja hvørki vera danir ella amerikanarar

Grønlendingar vilja hvørki vera danir ella amerikanarar, teir vilja vera grønlendingar.

Tað gjørdi Múte B. Egede, landsstýrisformaður, greitt í samrøðu við konservativu amerikonsku sjónvarpsrásinia Fox News í nátt.

- Grønlendingar vilja vera partur av vesturheiminum, og mál okkara er at økja samstarvið við okkara sterku sameindu, so sum USA.

Bundin at amerikansku trygdini

Samrøðan hjá grønlendska landsstýrisformanninum við Fox News, kemur í kjalarvørrinum á kjakinum, sum hevur tikið seg upp um Grønland, eftir at komandi amerikanski forsetin, Donald Trump, 7. januar segði, at hann ikki kann útiloka, at hann fer at brúka hervald ella fíggarligan tvingsil til at fáa ræði á Grønlandi.

Múte B. Egede læt heldur ongan iva vera um, at trygdin hjá Grønlandi er bundin at trygdini hjá USA. 

- Tit eru grannar okkara, og tykkara trygd er okkara trygd. Tað havi eg sagt fleiri ferðir nú, men tað er sera týdningarmikið at leggja dent á, segði grønlendski landsstýrisformaðurin við Fox News.

Sí brot úr samrøðuni í Fox News her: