Fyrstu palestinsku fangarnir latnir leysir

69 kvinnur og 21 menn eru latin leys í býti við teir fyrstu tríggjar gíslarnar, sum vóru latnir leysir í gjár

Millum palestinsku fangarnar, sum eru latnir leysir, eru 69 kvinnur. Her veittra tær úr bussinum hjá Reyða Krossi, sum koyrdi fangarnar úr fongslinum.

Mynd: AFP/Ritzau Scanpix

Frants Jensen

20.01.2025 - 09:38

Fyrstu 90 palestinsku fangarnir vóru latnir leysir stutt eftir midnátt.

Tað boðar ísraelska fongsulstænastan frá.

Bussarnir við teimum 90 fangunum fóru frá Ofer-fongslinum á Vestara áarbakka stutt eftir midnátt.

69 kvinnur og 21 menn vórðu latin leys, skrivar Reuters.

Hesi koma øll úr býum ella bygdum á Vestara aarbakka ella Eysturjerusalem.

Ísraelskur gísli leysur

Emily Damari er ein av teimum trimum kvinnuligu ísraelsku gíslunum, sum vóru latnar leysar í gjár. (Mynd: Reuters/Ritzau Scanpix)

Tey 90, sum verða latin leys, eru í býti við teir tríggjar ísraelsku gíslarnar, ið vóru latnir leysir í gjár. Hetta er fyrsti partur av vápnahvíldini millum Ísrael og Hamas, sum kom í gildi í gjár, og sum skal vara í seks vikur..

Íalt 33 gíslar skulu latast leysir í býti við 1900 palestinskar fangar.

Sambært avtaluni skulu 30 fangar verða latnir leysir fyri hvønn gísla. Men er talan um ein hermann ella herkvinnu, verða 50 fangar latnir leysir, skrivar NBC News.