Trump hevur framvegis Grønland í huganum

Donald Trump, sum í gjár tók við sum forseti USA, hevur framvegis Grønland í huganum. 

Hann nevndi tó ikki Grønland í setanarrøðu síni, men í Ovala rúminum í Hvítu húsunum í gjár, har hann skrivaði undir fleiri nýggjar fyriskipanir, spurdu journalistar um ætlanirnar hjá honum um Grønland:

"Grønland er vakurt. Vit hava brúk fyri Grønlandi í sambandi við altjóða trygd, og eg eri vísur í, at Danmark fer at akta. Tað er dýrt hjá Danmark at hava og halda tað viðlíka. Grønlendingar eru ikki nøgdir við Danmark. Eg haldi, at teir eru nøgd við okkum. Grønland hevur týdning, - ikki fyri okkum, men fyri altjóða trygd. Russisk og kinesisk skip eru allastaðni, krígsskip. Danmark klárar tað ikki," segði Donald Trump.

Nýggjur veruleiki

Danski forsætisráðharrin, Metta Frederisken, skrivar á Facebook meira yvirskipað um næstu fýra árini:

- Sama hvat hann, Trump, fer at siga í setanarrøðu síni, so vænti eg, at vit sum evropearar mugu skipa okkum í nýggjum veruleika. Vit eru í eini óvæntaðari og ógvusligari uttanríkispolitiskari støðu, sum ikki steðgar fyribils, skrivaði hon m.a. á Facebook.