NRK: Jens Stoltenberg verður fíggjarmálaráðharri

Nógv bendir á, at Jens Stoltenberg, fyrrverandi Nato-aðalskrivari, verður fíggjarmálaráðharri í norsku stjórnini, siga keldur fyri norska kringvarpinum NRK.

Jonas Gahr Støre, forsætisráðharri, hevur tilnevnt nýggjar ráðharrar, eftir Miðflokkurin tók seg úr samgonguni í síðstu viku. Og tað er í hesum sambandi, at Jens Stoltenberg verður nevndur sum ráðharri.

Miðflokkurin hevur havt átta ráðharrar í stjórnini, og formaðurin í flokkinum, Trygve Slagsvold var fíggjarmálaráðharri. 

Jens Stoltenberg var forsætisráðharri, áðrenn hann gjørdist Nato-aðalskrivari. Og Jonas Gahr Støre gjørdist formaður í Arbeiðaraflokkinum eftir hann.

Meðan hann var Nato-aðalskrivari, var Jens Stoltenberg tilnevndur tjóðbankastjóri, men hann tók ikki av starvinum, og helt fram sum Nato-aðalskrivari.

Ráðharrarnir í umskipaðu stjórnini í Noregi verða kunngjørdir fyrrapartin.