Flogbóltur: Sí fær Mjølnir í FM-finaluni

Við tryggum sigri á Ternuni staðfesti Mjølnir tað, sum leingi hevur verið greitt. Klaksvíkingar skulu spæla ímóti SÍ í finalunum um føroyameistaraheitið

Mjølnir skal spæla FM-finalu aftur í ár. Tað er greitt eftir tryggan sigur á Ternuni um vikuskiftið

Mynd: Flogbóltssamband Føroya

Símun Christian Olsen

13.02.2025 - 12:13

Við tryggum sigri á Ternuni við trimum settum ímóti ongum staðfesti Mjølnir sítt pláss í FM-finalunum, har SÍ verður mótstøðulið.

Mjølnir hevur nú 30 stig eins og oddaliðið úr Sørvági, sum hevur spælt ein dyst minni. Hetta merkir, at eingin kann fáa hvørki SÍ ella Mjølnir aftur, nú liðini hava tríggjar ella fýra dystir eftir at spæla, skrivar Flogbóltssamband Føroya.

Oddaliðini hava framvegis 1. plássið at kappast um. Liðið, sum endar fremst, fær heimavøll í tí fyrstu og eini møguligari triðju FM-finalu.

Sí tekur ímóti norðingunum í síðsta landskappingardystinum teirra millum 2. mars.

Fyrsta FM-finalan verður spæld í viku 12, onnur finalan 22. mars og ein møgulig triðja finala 29. mars.