Vegur á Traðarhamri leingir farleiðina og økir CO2-útlátið

Uppskotið hjá partafelagnum Suðuroyartunlinum um at gera veg uppi á Traðarhamri merkir, at ferðslan skal lyftast úr 180 metra dýpi upp í 220 metra hædd, 400 hæddarmetrar.

90 sentilitrar meira brennievni vera í miðal brúktir fyri hvønn túrin ella 460.000 litrar um árið.

Roknað er við 1.400 bilum um samdøgrið.

Meirútlátið av CO2 verður í miðal tvey kilo fyri túrin ella 1.022 tons um árið. 

Gummi endar í náttúruni

Meirnýtsla av dekkum, sum gera, at gummi endar í náttúruni, er mett at vera sløk tvey tons um árið.

Tað siga Kristian Stórhamar, Jón Sigurdsson og Mourits Joensen, sum mæla til at hava tunnilsmunnan norðan fyri Sands bygd.

Í teirra loysnum eru 210 hæddarmetrar.

P/f Suðuroyartunnilin ætlar at hava tunnilsmunnan í Djúpadali.

Kristian Stórhamar, Jón Sigurdsson og Mourits Joensen siga, at verður vegurin gjørdur á Traðarhamri, verður farleiðin góðar fimm kilometrar longri enn teirra loysn, sum er at gera tunnilsmunnan norðan fyri Sands bygd.