Hartar DR fyri at taka sending um Grønland av heimasíðuni

Grønlendski landstsýrisformaðurin, Múte B. Egede, gevur ilt av sær, nú Danmarks Radio hevur tikið sendingina "Hvíta gullið hjá Grønlandi" av heimasíðuni og koyrt tíðindastjóran til hús.

- Hetta er ein fullkomulig noktan av kjarnanum í dokumentarinum - nevniliga at Danmark hevur forvunnið nógv burtur úr okkum og upp á bekostning av okkum, sigur Múte B. Egede á Facebook.

-Tað ber ikki til at krógva sínar órættvísu gerðir og sína kolonialu fortíð, bara við at avnokta og krógva hetta fyri okkum. Eg fari enn einaferð at rósa liðnum aftan fyri sendingina fyri at lýsa veruleikan og møguleikan fyri at tosa opið um tað, skrivar grønlendski landsstýrisformaðurin.

Grønlands hvide guld

Dokumentarsendingin "Grønlands hvide guld" er nú tikin av heimasíðuni hjá danska kringvarpinum.

Nógv umrøða

Sendingin um hvíta gullið í Grønlandi hevur fingið nógva umrøðu. Sendingin snýr seg um kryolitnámið í Ivittuut og um stóru inntøkurnar, sum danski staturin og danska fyritøkur hava fingið úr náminum.

Í Danmark hevur sendingin verið fyri atfinningum, m.a. frá búskaparfrøðingum, sum halda, at sendingin hevur eina ov einfalda mynd av vinninginum í náminum. 

Mikudagin avgjørdi DR at taka sendingina av heimasíðuni og koyra tíðindaleiðaran, Thomas Falbe, sum hevði ábyrgdina av sendingini, til hús.  

Grønlendingar hava annars heilsað sendingini vælkomnari, tí teir meta, at hon lýsir væl, hvussu stór virði eru tikin úr Grønlandi til Danmarkar uttan um fólkið og myndugleikarnir í landinum.