Nations League: Føroysku kvinnurnar greitt við undirlutan

Slovakia vísti seg at vera eitt nummar sterkari enn Føroyar, og heimaliðið vann eisini tryggan 3-0 sigur í Trnava

Ásla Johannesen og hinar á føroyska fótbóltslandsliðnum taptu 3-0 fyri Slovakia í Nations League

21.02.2025 - 20:03

Føroysku kvinnurnar taptu 3-0 á Slovakia í fyrsta dystinum í nýggju Nations League-kappingini.

Patrícia Hmírová og Tamara Morávková góvu Slovakia eina 2-0 leiðslu í fyrra hálvleiki, og eftir steðgin økti Klaudia Fabová til 3-0.

Slovakia er meir enn 50 pláss omanfyri Føroyar í FIFA-styrkislistanum, og tað sást eisini á vøllinum, har heimaliðið hevði tamarhald á mestsum alla tíðina.

Føroysku spælararnir stóðu toluliga væl í verjustøðu, og serliga Birita Ryan og málverjin, Óluva Allansdóttir Joensen, kunnu vera væl nøgdar við avrikið.

Spælið við bóltinum riggaði sjáldan, og sjálvt tá onkur møguleiki stakk seg upp, eydnaðist illa at fáa glið á í spælinum fram eftir vøllinum.

Tað verður vónandi betri, tá Føroyar skulu royna seg ímóti Gibraltar týsdagin.

Štadión Antona Malatinského (Nations League, 1. umfar)

Slovakia - Føroyar, 3-0 (2-0)
1-0 Patrícia Hmírová, 20 min.
2-0 Tamara Morávková, 29 min.
3-0 Klaudia Fabová, 60 min.