Landskassalán verður partapeningur í Firum

Pengarnir, sum landið lænti partafelagnum Firum í 2017, skulu gerast partapeningur hjá landinum í Firum, ið er partafelag hjá landsstýrinum.

Talan er um níggju milliónir krónur. 

Tað er uppskot hjá Vinnumálaráðnum.

Firum hevði 98.000 kr. í yvirskoti í 2023.

Við árslok 2023 var eginognin negativ. Hon var tvær milliónir og 262.000 kr. negativ.

Bøta fíggjarligu støðuna

Endamálið við lógaruppskotinum er at gera fíggjarligu støðuna hjá Firum betri.

Tað skal millum annað gera eginognina positiva. 

Tað skal eisini gera tað einfaldari hjá Firum at vera við í granskingarverkætlanum, sum  eru  lutvíst  fíggjaðar við útlendskum granskingarpengum.

Sambært avtaluni um rentufría ábyrgdarlánið skal afturgjaldingin av láninum ikki tyngja framtíðar rakstur og menning hjá Fiskaaling, sum Firum kallaðist fyrr.