Træta um fráboðað samhugaverkfall endað í Fasta gerðarrættinum

28. mars fer Fasti gerðarrættur at gera av, um hann skal vísa frá sær eitt mál hjá Føroya arbeiðsgevarafelag og Starvsfelagnum.

Føroya arbeiðsgevarafelag kærdi Starvsfelagið, tá Starvsfelagið lýsti samhugaverkfall 8. juni í fjør.

Tað var, tá arbeiðarafeløgini vóru í verkfalli.

Samhugaverkfallið bleiv tó av ongum, tí dagin eftir gjørdu arbeiðsgevarar og arbeiðsfólk sáttmála.

Brot á friðarskyldu

Føroya arbeiðsgevarafelag heldur uppá, at lýsta samhugaverkfallið var brot á friðarskylduna og ella eitt óheimilað stríðsstig og ella í stríð við galdandi siðvenju.

Í lýsingini var ikki sagt, nær verkfallið skuldi enda, men bara nær tað var sett at byrja.

Arbeiðsgevarar siga, at eitt samhugaverkfall er altíð 24 tímar.

Starvsfelagið sigur, at tað stendur ongastaðni skrivað.  Starvsfelagið krevur, at Fasti gerðarrættur vísir kæruni frá sær.

Fasti gerðarrættur tekur støðu 28. mars.