Kanjon og kirkjuráðið hava longt freistina til 5. juni

Kirkjuráðið á Argjum og byggifyritøkan Kanjon komu í gjár ásamt um at leingja freistina, so byggingin av nýggjari kirkju við Sandá kann byrja 5. juni.

Tað sigur Rúni Hentze, formaður í kirkjuráðnum, í stuttari viðmerking við Kringvarpið í dag.

Upprunaliga ætlanin var annars, at spakin skuldi setast í í dag, 5. mars, men tað varð av ongum, eftir at Føroya Kærustovnur herfyri afturvísti málið til nýggja viðgerð hjá kommununi.

Tað gjørdi Kærustovnurin, tí kommunan hevði ikki partshoyrt nærmastu grannarnar.

Tað er kommunan í ferð við at gera nú, og grannarnir hava júst fingið longt hoyringarfreistina eina viku, til 12. mars. 

Kringvarpið skilir, at 16 húski í grannalagnum hava fingið hoyringarbræv. Væntandi verður eitt felags hoyringarskriv sent kommununi frá teimum, sum eru ímóti, at nýggj kirkja verður bygd við Sandá.

Kringvarpið hevur eisini tosað við Kjartan Hansen, stjóra í Kanjon, men hann hevur onga viðmerking til málið í løtuni.