Landsstýrisformaðurin: Grønland er okkara

Hvørki USA ella nakað annað land skal gera av, hvønn Grønland hoyrir til.

Soleiðis ljóðaðu boðini enn einaferð frá Mute B. Egede, landsstýrisformanni í Grønlandi. 

Í gjár helt amerikanski forsetin røðu fyri kongressini, og har endurtók hann, at Grønland so ella so kemur undir amerikanskt ræði.

- Grønland er okkara, svarar Mute B. Egede á sínum facebook-vanga, tað mugu amerikanarar og leiðara teirra skilja. 

Ikki til sølu

- Vit eru ikki til sølu, og vit kunnu ikki bara takast. Okkara framtíð verður avgjørd av okkum og í Grønlandi. 

Í røðunii í kongressini vendi amerikanski forsetin sær beinleiðis til grønlendska fólkið. 

- Vit stuðla tykkara rætti at avgera tykkara egnu framtíð. Um tit velja tað, eru tit vælkomin at gerast partur av USA, segði hann. Vit vilja ansa eftir tykkum, vit vilja gera tykkum rík, og saman vilja vit lyfta Grønland til nýggjar hæddir.

Múte B. Egede hevur allatíðina víst aftur, at onnur enn grønlendingar hava nakað at siga í málinum.

11. mars er val í Grønlandi.