Projekteringin byrjar næsta ár

Bergholið millum Gøtudal og Skálafjørðin er ikki gloymt.

Sambært Landsverki verður klárt at prosjektera bergholið tíðliga í 2026.

Men treytin er sjálvandi, at pengar eru til tess. 

Í ár er ein millión játtað til at gera jarðfrøðiligu kanningarnar lidnar og halda fram at fyrireika bergholið.

Tað sigur Jóhan Christiansen, landsstýrismaður, í svari til Terja Beder, løgtingsmann.

Málið er ikki nýtt.

Í 2019 vóru tvær mió. kr. játtaðar til at fyrireika verkætlanina. 

Við í samferðsluætlan

Bergholið er við í samferðsluætlanini hjá Landsverki fyri árini 2018 til 2030.

Sambært henni skuldi bergholið gerast árini 2022 til 2025. Tað skuldi sostatt verið liðugt í ár.

Bergholið til Fámjins skuldi sambært samferðsluætlanini gerast eftir bergholið í Gøtudali. 

Landsverk dagførir samferðsluætlanina. 

Tað verður eitt gott grundarlag fyri at dagføra íløguætlan landsins. 

Gøtudalstunnilin, sum bergholið verður rópt, er ein týðandi liður í at útbyggja høvuðsvegakervið, og er ein skilagóð íløga, sigur Jóhan Christiansen.