Tónaskald í útlegd: Nýggj útvarpssending um Regin Dahl

Regin Dahl varð føddur í 1918 og doyði í 2007. Hann vaks upp í Sandagerði og fór í 1934 niður á Sorø Akademi at taka studentsprógv, sum hann fekk í 1937. Hetta sama árið gav hann út sítt fyrsta yrkingasavn, og longu tá var hann farin at skriva løg.

Regin Dahl skrivaði hundraðtals løg til føroyskar, norðurlendskar, týskar, latínskar og enskar yrkingar, og í fleiri umførum í 1970unum vórðu hesi løgini tikin upp. Upptøkurnar eru savnaðar á útgávuni, sum nevnist Atlantsløg frá 1997. Í 2019 kom út bókin "Heimurin, ið hvarv – útlagna sangtónaskaldið Regin Dahl og føroyska tjóðin" eftir Knút Háberg Eysturstein. 

Við síni stóru vitan leiðir Knút okkum ígjøgnum lagasmíðið hjá Regini Dahl, serliga til yrkingar hjá Hans Andriasi og Janusi Djurhuus, Jóannesi Patursson og Jákupi Dahl.

Í tveimum pørtum hoyra vit Regin sjálvan og ymisk onnur syngja kendar og minni kendar sangir, sum Regin eigur løgini til.

Hvat: Tónaskald í útlegd
Nær: 1. og 2. páskadag klokkan 13.10
Hvar: Í útvarpinum og á KVF Ljóð