H71 avgjørdi FM í Hoyvík

H71 vann fjórðu FM-finaluna á Kyndli og tryggjaði sær sítt triðja føroyameistaraheiti upp á fýra ár.

Maria Halsdóttir Weyhe og hinir hoyvíkingarnir vóru vónbrotnar um vikuskiftið, tá tað eydnaðist Kyndli at minka til 2-1 í røðini, men tær svaraðu aftur við flottum avriki í Hoyvíkshøllini.

Heimaliðið var omaná frá byrjan og fór til hálvleiks við eini 12-9 leiðslu, og hóast Kyndil kom upp á 16-16 eftir steðgin, helt H71 høvdið kalt og vann 26-24.

Anna Elisabeth Halsdóttir Weyhe (7) og Maria Halsdóttir Weyhe (5) vóru toppskjúttar hjá H71, meðan Bjarta O. Johansen (6) og Turið Arge Samuelsen (5) skoraðu mest fyri Kyndil.

Hetta er vónbrot fyri Kyndil, sum vann allar dystirnar í grundspælinum og steypakappingina í februar.