- Hon hevur avgjørt ein góðan møguleika at klára seg væl

- Sissal hevur absolutt ein møguleika at klára seg væl í finaluni. Eg síggi, at veddingarfyritøkurnar hava hana í dag á 19. plássið av teimum 26, sum eru við í finaluni annaðkvøld. Men nú hevur Sissal víst, at hon megnar at gera teirra spádómar til skammar og tí er tað als ikki óhugsandi, at hon kann standa seg enn betur enn tað. Tað sigur Rúni Jákupsson, sum var staddur í Basel gjárkvøldið, tá Sissal Jóhanna Norðberg Niclasen sang seg víðari í Eurovision finaluna sum tann fyrsti føroyingurin nakrantíð. Tá Sissal stóð á palli, var hann saman við túsundtals Eurovision fjepparum í Eurovision Village og rómurin var ótrúligur. Fjepparanum dámdi so mikið væl 'Hallucination' og framførslan var kanska millum tær, sum fingu ta bestu móttøkuna av øllum í seinni semifinaluni í gjárkvøldið.