Nógvur norskur laksur trýstir prísin niður

Rakstrarúrslitið hjá Bakkafrost samtakinum í fyrsta ársfjórðingi er 505 milliónir krónur fyri skatt.

Tað var 710 milliónir fyrsta ársfjórðing í fjør. 

Tøkan í Føroyum var 18.914 tons og í Skotlandi 6.286 tons.

Lívfrøðiliga gongdin er góð, sigur Bakkafrost. 

Bæði í Føroyum og Skotlandi vóru lúsatølini lítil.

Miðalvektin hjá tikna laksinum er stór, serstakliga í Skotlandi.  

Marknaðurin hevur verið avbjóðandi í ársfjórðinginum. 

Prísurin var góður í januar, men fall síðani nógv, nógv meira enn tey flestu høvdu væntað. 

Hetta kemst fyrst og fremst av størri útboði, serliga úr Noregi, har útboðið av heilum laksi er 38 prosent størri.

- Samanumtikið eru vit nøgd við úrslitið í hesum ársfjórðinginum, sigur Regin Jacobsen, stjóri.