Rokfundur um svartkjaft

Dagført kl. 14:00

Rættiligt rok var á fundi hjá strandarlondunum um uppsjóvarfisk í síðstu viku.

Tí ES hevði uppskot um svartkjaftabýti, sum gav ES og Føroyum nógv størri lut enn tey hava nú. 

Og størri lut enn øll hini strandalondini eiga at fáa.

Hetta ger so, at hini londini missa nógv.

Uppskotið hjá ES er millum annað, at Noregur fer úr 26,2 prosentum niður í 5,8 prosent av heildarkvotuni.

Rokfundur

Íslendski miðilin Fiskifréttir skrivar, at fundurin endaði í roki og ikki var tosað um hini fiskasløgini, so sum makrel og sild, sum ætlanin annars var.

Serliga Noregur er í øðini inn á ES.

Audun Maråk, stjóri hjá Fiskebåt, sum er reiðarafelag í Noregi, segði, at uppskotið hjá ES fær avleiðingar fyri samstarvið millum Noreg og ES um fiskiskap.

Hann tosaði beinleiðis um sabotajsu hjá ES.

ES hevði formansskapin á fundinum, sum var í London 10. og 11. juni.  

Skrivlig viðmerking

Jóhan Christiansen, landsstýrismaður í fiskivinnumálum, vil ikki gera viðmerkingar til málið. 

Fiskivinnu- og samferðslumálaráðið hevur í staðin sent okkum eina stutta skrivliga viðmerking, har m.a. verður skrivað, at:

"Ein stórur partur av svartkjaftinum verður fiskaður í føroyskum sjóøki, og tí hava samráðingarnar um eina strandalandasemju um svartkjaft høga raðfesting í Føroyum. Fiskivinnu- og samferðslumálaráðið hevur ikki viðmerkingar til, hvørji uppskot verða løgd fram, og hvørji sjónarmið verða førd fram undir samráðingunum."

Fundur er avtalaður at vera aftur 10. september.