Ov tíðliga at taka løgtingið uppí

Uttanlandsnevndin sleppur upp í part, tá málið er búgvið til tess.

Og tað er tað ikki enn, sigur løgmaður.  

Bárður á Steig Nielsen, løgtingsmaðir, spurdi Aksel V. Johannesen, løgmann, um rættin hjá uttanlandsnevndini sambært stýrisskipanarlógini at vera hoyrd, tá landsstýrið hevur samráðingar við  ríkismyndugleikarnar, sum eru av stórum týdningi fyri viðurskiftini Føroya og Danmarkar millum.

Tað er rætt, at landsstyrið eigur at ráðføra seg við uttanlandsnevndina, svarar løgmaður.

Og hetta fer sjálvsagt at vera gjørt, sigur hann.

Men ikki fyrr enn landsstýrið fer undir slíkar samráðingar. 

Hagar er málið ikki komið. Talan er ikki um samráðingar enn, sigur løgmaður.

Landsstýrið hevur bara greitt donsku stjórnini frá, at fimm av seks flokkum vilja hava eina skipan, sum gevur Føroyum uttanríkispolitiskar heimildir og byggir á samstarv millum javnbjóðis lond í einum felagsskapi.