Vilja hava Fasta gerðarrætt at viðgera málið av nýggjum

Skipara- og navigatørfelagið vil hava Fasta gerðarrætt at viðgera av nýggjum málið hjá felagnum og Reiðarafelagnum fyri handilsskip.

Skipara- og navigatørfelagið tapti málið í Fasta gerðarrætti. 

Tað ber til í serligum førum, at Fasti gerðarrættur tekur eitt mál uppaftur.

Skipara- og navigatørfelagið heldur, at hetta málið hevur alstóran prinsipiellan týdning sum fordømi fyri allan siglandi arbeiðsmarknaðin.

Fyrsti ferðadagur

Skipara- og navigatørfelagið vil hava reiðarafelagið at viðurkenna, at fyrsti ferðadagur hjá skipara ella stýrimanni sambært sersáttmálanum fyri størri handilsskip í frálandavinnu er dagurin eftir, at skipari ella stýrimaður er avloystur ella farin í land.

Hann vinnur sær tí rætt til ein frídag fyri hendan dag, sigur felagið.

Men tað helt Fasti gerðarrættur ikki.

Partarnir hava gjørt ein sersáttmála, sum sigur, at ferðing er íroknað frítíð.

Í sáttmálanum eru tveir dagar til ferðing aftur og fram, sigur Fasti gerðarrættur.

Avloysingardagur og ferðadagur eru sami dagur, sigur rætturin. Sersáttmálin gevur ikki grundarlag fyri eyka frídegi. 

Gamalt mál

Málið er ikki nýtt.

Tað byrjaði við, at Fasti gerðarrættur fekk kæruritið frá Skipara- og navigatørfelagnum 1. mai 2023.

Avgerðin hjá Fasta gerðarætti kom 1. juli í ár.