Stovnar, sum arbeiða ímóti korruptión, hava fingið virkisførið aftur

Lóggávutingið í Ukraina tók við stórum meiriluta undir við einum lógaruppskoti frá Volodomyr Zelenskyj, forseta, sum gevur teimum báðum stovnunum, ið arbeiða ímóti korruptión í landinum, virkisførið aftur.

Tað skrivar AP-tíðindastovan í dag.

Hetta er ein afturrulling av lógini, sum Zelenskyj skrivaði undir í seinastu viku, og sum gjørdi somu stovnar minni virkisførar. 

Stovnarnir vórðu tá lagdir undir almenna ákæruvaldið.

Mótmælisfólk og ES stúrdu

Hetta fekk ukrainsk mótmælisfólk, umframt ES-eygleiðarar, at stúra fyri, at stjórnin fer at leggja seg útí, hvør skal kannast og ikki, tá illgruni er um korrupt viðurskifti.

At hava sterkt anti-korruptiónseftirlit er týðandi fyri møguleikan hjá Ukraina at sleppa upp í ES, og ikki minst av hesi orsøk fóru mótmælisfólk út á gøturnar, tá korruptiónseftirlitið stóð til at missa vald. 

Men nú er Zelenskyj so bakkaður. Hann segði seg í gjár hava skrivað undir lógina, sum styrkir antikorruptiónsstovnarnar av nýggjum, bert tveir tímar eftir at hon varð samtykt í tjóðartinginum.

Og tað er óvanliga skjótt.