Føroya rættur viðger mál um eftirgjørt kannabis-evni

Dagført klokkan 11:30:

Málið, sum Føroya rættur fer at viðgera í dag og í morgin, er tað fyrsta í danska dómsvaldinum um evnið 5F-MDMB-PINACA, stytt 5F-ADB. Hetta er eitt eftirgjørt kannabis-evni, sum er bæði sterkari og vandamiklari enn úrdráttir úr kannabisplantum.

Tveir menn, annar føroyingur og hin dani, eru ákærdir. 

Ein maður, sum tá var 21 ár, var tikin í Havn 17. juli í fjør.

Sambært ákæruritinum hava teir 7,2 litrarnir av 5F-MDMB-PINACA, sum vóru í sodavatnsblikkum, ein virknað, sum kann samanberast við 21 kilo av MDMA ella hálvtfimta kilo av kokaini ella 18 kilo av amfetamini.

Evnið kom til Føroya í einum bili 17. juli í fjør.

Ein annar maður, hann er 40 ár, er eisini ákærdur fyri at smugla 5F-MDMB-PINACA til Føroya. Hann var tikin í mai í ár.

Báðir menn nokta seg sekar.

Hørð revsing

Revsingin er hørð í slíkum málum, verða teir ákærdu funnir sekir.

Nøgdin av 5F-MDMB-PINACA  svarar til góð 18 kilo kilo av amfetamini, sigur politiið.

Í einum øðrum máli í Føroya rætti var fongsulsrevsingin upp í 11 ár fyri sløk fýra kilo av amfetamini og 22 kilo av hassji.

At brúka evnið 5F-MDMB-PINACA bleiv kent í november í 2014, tá tað bleiv funnið í einum deyðum manni í Japan.

Hvítvaska pengar

Annar maðurin, føroyingurin, er eisini ákærdur fyri at royna at hvítvaska pengar.

Hann var tikin á flogvøllinum í Vágum, tá hann skuldi til Keyphannahavnar.

Hann hevði 35.000 kr. við sær.

Politiið sigur, at pengarnir stava beinleiðis ella óbeinleiðis frá ólógligum virksemi.