Galaxy komin til landið - fer í sigling leygardagin

Galaxy, sum skal avloysa Smyril, er komin til landið, og liggur nú á Krambatanga á Tvøroyri.

Galaxy fer at sigla fyri Smyril, sum verður í dokk í Danmark í 8-10 vikur. 

Siglingin byrjar leygardagin 23, august.

Tveir túrar um dagin

Galaxy ger tveir túrar um dagin aftur og fram, og siglt verður av Krambatanga hvønn morgun klokkan seks uttan leygardag og sunnudag, tá siglt verður klokkan sjey av Krambatanga. 

Galaxy gongur 16 sjómíl um tíman, og siglingartíðin er hálvantriðja tíma. Avloysaraskipið tekur 250 ferðafólk og 140 akfør, um eingin farmur er við.

Sí ferðaætlan her.

Síðuskrúvur setast í 

Smyril fer til 20 ára klassing á Fayard skipsmiðjuni á Fjóni, og haraftrat skulu nøkur stórarbeiði gerast.

Tvær síðuskrúvur skulu setast í aftan, tríggir hjálpimotorar verða skiftir, og tveir høvuðsmotorar verða høvuðsumvældir.

Í 2028 skulu allir fýra høvuðsmotorarnir skiftast út.