Vesturkirkjan 50 ár

Vesturkirkjan var vígd 24. august í 1975 og fyllir sostatt 50 ár í ár.

Sunnudagin 24. august verður stórt hátíðarhald við hámessu, har Heri Joensen, Bergur D. Joensen, Derhard Jógvansson og Hanus á Gørðum eru prestar. Eisini ber Jógvan Fríðriksson, biskupur, heilsan fram, og Tórshavnar kamarkór syngur. Kirkjan verður eisini opin, skattaveiða er til børnini, og til ber at fara upp í tornið. Um kvøldið er hátíðar-orgulkonsert við Ara Hammer Joensen og Jógvani Thomsen, organistum, har frumframførsla er av orgulsymfoni, sum Ari Hammer Joensen hevur skrivað til dagin.

Nógv tiltøk eru á skrá vikuna aftaná - eitt nú stór gospelkonsert við Aalborg Gospelkóri, sálmatiltak fyri børn og vaksin, framsýningar, gongutúrur og grilling.

Nógv góð minnir úr kirkjuni

Vesturkirkjan liggur í størsta prestagjaldi í Føroyum. Tá ið hon var vígd í 1975, var tørvur á eini kirkju aftrat í Havn, tí býurin støðugt vaks. Tá var vesturbýurin tó ikki eins nógv útbygdur, og hann er nú, men í dag liggur Vesturkirkjan mitt í prestagjaldinum. Bergur Debes Joensen hevur verið prestur í Vesturkirkjuni í 30 ár, og hann hevur nógv góð minnir frá kirkjuni:

- Eg minnist eitt nú væl, tá eg gekk til prest í Vesturkirkjuni. Mín áhugi fyri tí kirkjuliga var sera stórur tá, og eg spurdi enntá prest, um eg kundi sleppa at halda prædiku, flennir Bergur.

Kirkjan hevur tó ikki bert týdning fyri hann sum arbeiðspláss, men eisini persónliga:

- Eg eri giftur í kirkjuni, og børnini eru doypt her, so Vesturkirkjan hevur eisini eitt stórt pláss í mínum hjarta persónliga - eins og hon hevur tað fyri nógv fólk, vísir Bergur Debes Joensen á.

Kringvarpið ger sending um kirkjuna og sendir frá hámessuni

Eisini Kringvarpið fer at hátíðarhalda 50-ára dagin hjá Vesturkirkjuni. Vit senda frá hámessuni 24. august og hava eisini gjørt eina sjónvarpssending um kirkjuna til høvið, sum verður send sama dag, klokkan 10.45.

Lurtið eftir samrøðuni úr Summarmorgni við Bergi Debes Joensen, presti, og Ingibjørg Winther, kirkjuráðslimi, sum greiða frá um upprunan, søguna og arkitekturin hjá Vesturkirkjuni og tiltøkunum í sambandi við 50-ára hátíðarhaldið.