Ongan stuðul til bil: "Ein katastrofa fyri meg"

- Hetta er ein katastrofa fyri meg. Tað sigur Katrin Dagbjartsdóttir, nú landsstýrismaðurin í almannamálum, Eirikur í Jákupsstovu, hevur gjørt greitt, at ongar ætlarnir eru um at lata fólki við skerdum virkisførleika fíggjarligan stuðul at keypa vanligan bil.

Hon mælir til at man rullar skipanina aftur, og vísir á, at sjálvt um bilurin verður mettur sum vanligur bilur, so kann hann hava stóran týdning sum hjálpiamboð. 

Í januar mánað í fjør misti hon rættin til fíggjarligan stuðul til keyp av vanligum bili.

Og í gjár slóð landsstýrismaðurin í almannamálum, Eirikur í Jákupsstovu, fast, at ongar ætlanir eru um at fáa skipanina setta í verk aftur.

Tað gjørdi hann í sínum svari til skrivligan fyrispurning frá Johan Dahl, løgtingsmanni fyri Sambandsflokkin.

Fyri Katrina Dagbjartsdóttir, sum hevur cerebrala paresu, merkir tað, at gerandisdagurin verður trupulari. 

Sjálv hevur hon brúkt stuðulsskipanina, sum nú er farin í søguna, síðan hon var átjan ára gomul.

Hon hevur havt sín bil í fýra ár, og tí eru seks ár eftir til hon skal hava nýggjan bil.

Hon torir ikki at hugsa um, hvørjar avleiðingar tað fær, tá bilurin er útslitin. Hon stúrir fyri einum lívi í framtíðini, har hon verður bundin at øðrum. 

Eitt áhugafelag, sum finst at avtøkuni av stuðulsskipanini er nýggja felagið Koyristólur Skerdur Førleiki.

Áhugafelagið umboðar fólk við skerdum virkisførleika, harímillum fólk, ið brúka rullustól.

Kaj Leo Holm Johannesen er formaður í felagnum. Hann heldur ikki, at tað sømir seg einum vælferðarsamfelagi at taka eina millión krónur frá fólkum, sum longu stríðast fyri at vera á jøvnum føti við onnur.