Jana vann í føroyingauppgerð

Jana Mittún var omaná í føroyingauppgerðini ímóti Rakul Wardum í fyrsta umfari av bestu donsku hondbóltsdeildini sunnudagin.

Viborg HK vitjaði Ringkøbing, og Jana Mittún skeyt fimm mál í 33-29 sigrinum hjá teimum grønum og átti næstseinasta hondina á fimm. 

Føroyski landsliðsmálverjin Rakul Wardum var inni minni enn helmingin av dystinum og hevði eitt bjargingarprosent upp á 23. 

Seinasta tíðin í Viborg hevur verið merkt av óró, eftir at stjørnan Christina Pedersen fyrst var koyrd úr hópinum, tí hon var óynskt av hinum spælarunum, og síðan fann sær nýtt felag. 

Høvuðsvenjarin, Ole Bitsch, fór eisini úr starvi fyri einari viku síðan, og tí kom sigurin í 1. umfari ivaleyst væl við hjá Janu Mittún og liðfeløgunum.