Vaksandi marknaður uttanfyri Føroyar og Danmark

Í 2013 vóru 94.705 gistingar, ella fólkanætur sum tað eitur á hagfrøðimáli, á føroyskum gistingarhúsum. Seinastu 12 mánaðirnar, t.e. frá august í fjør til og við juli í ár, var sama tal 242.619.

Orsøkin til, at tølini eru vaksin, er m.a. fleiri pengar at marknaðarføra Føroyar sum ferðavinnuland, umframt at vit hava fingið nýggjar flogrutur, sigur Guðrið Højgaard, stjóri í Visit Faroe Islands. Men hagtølini um gistingar skulu tó takast við fyrivarni.

Tølini siga nakað um, hvørjum londum, tey gistandi búgva í. Og tó. Bústaðarlondini, sum Hagstovan upplýsir, eita Føroyar, Danmark og "onnur lond". Guðrið Højgaard hevur tó okkurt boð upp á, hvørji tey londini eru.

- Hyggur mann eftir teimum londunum, sum eru uttanfyri Danmark, ella uttanfyri kongaríkið, um mann teknar ein radius upp á einar tríggjar tímar úr Føroyum, so fært tú Miðevropa, og eitt sindur niður í Suðurevropa. Tað er eisini har, vit hava sæð stóran vøkstur. Men vit síggja eisini vøkstur úr USA, og úr Asia, sum vit serliga hava sæð tey seinastu fáu árini. Primert Evropa, USA og Asia.