Stjórin í Sernámi gevst í starvinum

Landsstýrismaðurin í barna- og útbúgvingarmálum, Djóni Nolsøe Joensen, hevur sett í verk eina broytingartilgongd fyri at styrkja sernámsfrøðiliga økið og loysa trupulleikar við arbeiðsumhvørvinum á Sernámi.

Margreth F. Olsen, sum hevur verið stjóri í sjey og eitt hálvt ár, gevst í starvinum, meðan Tóra Petersen, sálarfrøðingur og PhD, er fyribils sett sum stjóri.

- Tað hava verið innanhýsis avbjóðingar við sálarliga arbeiðsumhvørvinum á Sernámi, sum arbeitt verður við at loysa. Farið verður beinanvegin undir eina tilgongd at fáa innanhýsis viðurskiftini á Sernámi rættað upp í góðum samstarvi við starvsfólkini, sigur Barna- og útbúgvingarmálaráðið.

Lagt undir Undirvísingarstýrið

Sernám fer frameftir at hoyra undir Undirvísingarstýrinum, og samstarv verður styrkt millum fólkaskúla, Sernám og Nám.

Síðani verður, í samstarvi við skúlaleiðslur, dagstovnar, Heilsuverkið, Almannaverkið, Gigni o.o., arbeitt við nýggjum loysnunum, sum skulu tryggja eina so góða tænastu sum møguligt fyri børn og ung.

Ein virkisætlan verður løgd fyri komandi hálva árið, og virksemið á Sernámi heldur ótarnað fram.

Les meira her.