Føroyingafeløgini í Týsklandi vunnu øll

Allir tríggir føroyingarnir í bestu týsku hondbóltsdeildini vunnu, tá 2. umfar varð spælt hóskvøldið.

Elias Ellefsen á Skipagøtu gjørdi aftur hesa ferð væl og virðiliga vart við seg við seks málum og trimum uppleggum, tá THW Kiel vann 34-30 á Wetzlar í fyrsta heimadystinum hjá norðurtýskarunum í nýggja kappingarárinum.

Tað gekk striltið hjá Kiel fyri steðgin, men føroyski spælskiparin skoraði til hálvleiksstøðuna 16-15, og í seinna hálvleiki helt hann fram við málskjótingini. Upp á góðar fimm minuttir frá 47. til 52. skeyt Elias Ellefsen á Skipagøtu tvey mál og legði upp til trý, og so var sigurin tryggjaður.

Bestu bitarnir frá dystinum, eitt nú fleiri mál hjá Eliasi, kunnu síggjast her niðanfyri. 

Vilhelm og teir í gongd

Hannover-Burgdorf var við í týska oddastríðnum stóran part av farna kappingarárið, men Vilhelm Poulsen og teir taptu fyri Gummersbach í 1. umfari fyri viku síðan. Hóskvøldið eydnaðist kortini at fáa tvey tey fyrstu stigini á talvuna, tá HSV tók ímóti.

Vilhelm Poulsen, ið ikki altíð skjýtur so nógv mál, skoraði hesa ferð trý og legði upp til eitt - alt eftir steðgin - og Hannover vann 33-29. 

Füchse Berlin vann eins og í 1. umfari trygt. Høvuðsstaðarfelagið fór norður aftur úr Göppingen við 32-26 sigri.

Hákun West av Teigum mátti síggja liðfelagan Leo Prantner skjóta heili níggju mál av høgra veingi.

Kanska føroyingurin varð spardur til stórdystirnar ímóti Magdeburg og Nantes (Champions League) í næstum, men umsóknin hjá italska veinginum bilaði einki.

Füchse Berlin og THW Kiel hava fult stigatal, meðan Hannover-Burgdorf hevur tvey stig.