Elisabeth Holm fekk altjóða heiðursløn

- Vónandi kann hetta vera íblástur til onnur, sum granska innan smámál. Tað sigur Elisabeth Holm, adjunktur á Fróðskaparsetri Føroya, sum hevur fingið bókaheiðurslønina BAAL fyri sína gransking innan føroyskt sum annað mál. BAAL er stytting fyri British Association for Applied Linguistics.

Heiðurslønin verður latin á hvørjum ári fyri "framúrskarandi bøkur á nýtslumálvísindaliga økinum." Forløgini innstilla bøkurnar og tær verða so dømdar í fleiri umførðum, og at enda eru 4 bøkur eftir. Í ár var ein teirra útgávan hjá Elisabeth Holm sum hevur heitið "Migration, Adult Language Learning and Multilingualism"

Tað er fyrstu ferð, at ein, sum gevur sína fyrstu bók út, vinnur heiðurslønina. Hetta er ein viðurkenning, sum varpar ljós á føroyska gransking.