Biðja um eykajáttan til løgtingsbygningin

Løgtingið fer í dag at hava fyrstu viðgerð einum uppskoti frá formansskapinum í løgtinginum um eykajáttan at umvæla løgtingsbygningin.

Málið snýr seg um bygningin uttan. 

Glaspláturnar vórðu tiknar niður í apríl og mai í fjør, av trygdarávum. 

Tað var beint fyri ólavsøku í 2023, at petti av einari plátu duttu niður á gongubreytina við Tinghúsvegin.

Og fyrr í fjør summar datt ein pláta av á hinari síðuni á bygninginum. 

1,4 milliónir

Formanskapurin biður um 1,4 milliónir krónur í eykajáttan til at fyrireika umvælingina.

2,5 milliónir krónur vórðu játtaðar í fjør. 

Góðar 600.000 krónur vórðu nýttar bráðfeingis, tí neyðugt var at tryggja, at ikki fleiri plátur duttu niður. 

Restin av játtanini fall burtur. 

Mett verður, at tað fer at kosta tríggjar milliónir at fyrireika umvælingina, og tí verður biðið um eykajáttan upp á 1,4 milliónir og heimild at flyta óbrúktu játtanina.