Frítekst tagging:
- Tíðindi, mentan og ítróttur
Óli Mittún skjótur aftur á vøllinum
Óli Mittún skjótur aftur á vøllinum
Føroyski hondbóltsspælarin Óli Mittún, sum mátti av vølli við skaða í dystinum ímóti Aalborg, verður ikki uttanfyri leingi, tí skaðin er ikki so ringur, sum óttast var
Óli Mittún verður takklaður av Felix Møller í dystinum ímóti Aalborg leygardagin
Mynd: Bo Amstrup/Ritzau Scanpix
15.09.2025 - 12:28
Nógv mundu stúra, tá Óli Mittún ikki kom aftur á vøllin til seinna hálvleik í toppdystinum ímóti Aalborg leygardagin.
Føroyski landsliðsspælarin var takklaður hart av fyrrverandi Sävehof-liðfelagnum Felix Møller seint í fyrra hálvleiki, og meðan sviin fekk reytt kort, meiddi Óli Mittún sær økslina so mikið illa, at hann ikki fekk spælt eftir steðgin.
Í staðin mátti bakspælarin hyggja at av bonkinum, og hann sá ikki sørt stúrin út á sjónvarpsmyndunum. Tað gav Óli Mittún eisini til kennar eftir dystin, tá hann varð spurdur av tíðindafólkunum.
Nú hevur 20 ára gamli GOG-spælarin kortini fingið góð tíðindi. Skaðin er ikki so ringur, sum óttast var - ein lítil fipurspreinging undir økslini - og Óli Mittún fær spælt aftur um eina til tríggjar vikur.
- Ja, sjálvandi er tað ein lætti at skaðin ikki var verri, sigur føroyska stjørnuskotið.
- Eg havi sæð sovornar støður óteljandi ferðir, ið enda við skaðum, sum halda spælarum uttanfyri nógv longur enn tað, sum eg havi fingið staðfest. Tað er sjálvandi sera positivt. Tað var ringt hjá mær at meta um, hvussu ringur skaðin var, tí eg ikki havi prøvað nakran álvarsligan skaða. Eg var eitt sindur stúrin úti á bonkinum, má eg viðganga.
Mikukvøldið skal GOG spæla í Champions League ímóti Pick Szeged, har fyrrvarandi venjarin hjá Óla Mittún í IK Sävehof, Michael Apelgren, stendur á odda. Hesin dysturin kemur ov tíðliga fyri føroyingin, men tað er ikki ómøguligt, at Óli Mittún kann spæla ímóti Grindsted næsta fríggjakvøld ella ímóti Eurofarm Pelister í Champions League í næstu viku.
Óli Mittún ímóti Barcelona í Champions League. Hann verður ikki við ímóti Pick Szeged fríggjakvøldið, men er glaður fyri, at skaðin ikki er álvarsamur.
Er kopiera
Nýggjastu sendingar í ÚV
Nýggjastu sendingar í SV
