Frí fosturtøka aftur í tingið týsdagin

Fýra tingfólk - trý úr samgonguni og eitt úr andstøðuni - leggja nú fram lógaruppskot um at broyta fosturtøkulógina.

Lógaruppskotið verður lagt fyri løgtingið í næstu viku, væntandi á tingfundinum týsdagin, tá framløga er á skránni. 

Talan er um sama lógaruppskot, sum Bjarni Kárason Petersen, landsstýrismaður í lógarmálum, legði fram á vári í fjør.

Frí forsturtøka til 12. viku

Uppskotið var at loyva fría fosturtøku til 12. viku. 15 atkvøður vóru fyri, og 15 ímóti, so uppskotið fall.

- Vit hava eina vón um, at tað fer ígjøgnum. Annars høvdu vit ikki lagt tað fram. Broytingar hava verið í nevndum, í landsstýrinum og í tingbólkum, so jú vit vóna, at hetta kemur í gjøgnum, sigur Ingilín D. Strøm, løgtingskvinna.

Fýra samgongufólk - tvey úr Framsókn og tvey úr Javnaðarflokkinum - atkvøddu ímóti.

Frí fosturtøka uppskotsstillarar

Tey fýra tingfólkini, sum nú leggja lógaruppskotið fram, eru Ingilín D. Strøm úr Javnaðarflokkinum, Hervør Pálsdóttir úr Tjóðveldi, Karlot Hergeirson úr Framsókn og Eyðdis Hartmann Niclasen úr Sambandsflokkinum.

- Tað er umráðandi at fáa málið fram aftur áðrenn eitt val, tá samansetingin av tinginum møguliga verður øðrvísi, sigur Karlot Hergeirson. 

Hervør tekur sætið aftur

Tað eru bara tríggjar vikur síðani, at Hervør Pálsdóttir fór í barnsburðarfarloyvi úr løgtinginum.

Men hon tekur sætið aftur á løgtingi, nú lógaruppskotið um at broyta fosturtøkulógina verður lagt fyri tingið. 

- Tað snýr seg um, at kvinnur í Føroyum skulu fáa rættin at velja, og eg vil gera alt, sum eg kann fyri, at tað hendir. Tí vil eg heldur vera innanfyri, nú tá tað er størri møguleiki fyri, at tað kemur í gjøgnum, enn at sita uttanfyri og hyggja at, sigur hon. 

Eyðdis Hartmann Niclasen er burturstødd í løtuni og er tí ikki við í innslagnum.