Føroyskt fýrverk í Hannover

Elias Ellefsen á Skipagøtu er flúgvandi í hvítu og svørtu blusuni hjá THW Kiel í løtuni.

Leygardagin skeyt hann 11 mál í Hamburg, og í gjár skipaði føroyski bakspælarin fyri sonnum fýrverki, tá hann skeyt heili 14 mál í 40-34 sigri á Vilhelmi Poulsen og teimum í Hannover-Burgdorf.

Afturat málunum átti Elias Ellefsen á Skipagøtu næstseinastu hond í trimum málum og stjórnaði álopsspælinum hjá útiliðnum við tryggari hond.

Kiel hevur vunnið allar fýra dystirnar í landskappingini higartil, og føroyingurin, sum ikki altíð tykist hava fingið fult álit frá venjaranum, Filip Jícha, hevur spælt alsamt størri leiklut og er nú í stórformi.

Næstu dystirnir eru ímóti Leipzig og Minden, og tí er ikki ósannlíkt, at Kiel hevur fult stigatal, tá hitt oddaliðið, Magdeburg, tekur ímóti síðst í september.

Hákun hundrað prosent

Hákun West av Teigum gjørdi sítt, tá Füchse Berlin vann á Aalborg í Champions League í gjár. Føroyingurin var, sum hann so ofta er, tryggur av høgra veingi.

Hann skeyt fýra mál upp á fýra skotroyndir í 31-28 sigrinum hjá høvuðsstaðarfelagnum úr Berlin. Í Bundesliguni hevur Füchse Berlin longu tapt tvær ferðir, men í evropeisku meistarakappingini hava Hákun West av Teigum og teir vunnið báðar dystirnar higartil.

Í næstu viku bíðar torfør uppgáva, tá revarnir skulu á vitjan í Kielce í triðja CL-dystinum. Áðrenn tað vitjar Melsungen í Max-Schmeling-Halle í Berlin.

20250918-200454-b-3233x2155ma.jpg

Frítekst tagging: 

Ítróttur

Hondbóltur

Füchse Berlin

Mathias Gidsel