Seinasta vaktin hjá Tobba

Týsdagin 7. oktober fyllir Tórbjørn Jacobsen 70 ár, og nú hevur hann boðað frá, at tá hendan býráðssetan er liðug tann 31. desember 2028, stillar hann ikki upp aftur.

Í samrøðu við Dimmalætting váttar Tobbi, sum hann vanliga verður nevndur, at hansara dagar í politikki eru við at vera taldir, tí hann gongur sína seinastu vakt. 

"Vit mugu lata tey yngru sleppa framat, tí samfelagið skal ikki bara mala runt í okkara tíð, tað skal eisini mala runt í framtíðini," sigur Tórbjørn Jacobsen.

Føðingardagurin verður longu feiraður við stórari fagnaðarløtu í Løkshøll sunnudagin.   

Mest eyðkenda røddin

Tórbjørn Jacobsen, ið er heimskendur í Føroyum  fyri sínar bersøgnu og harðmæltu talur, hevur í samfull 27 ár verið ein hin mest eyðkenda røddin í føroyskum politikki - og í samfelagskjakinum sum heild.  

Tobbi hevur verið fiskimaður, sjómaður, skipari, havnarmeistari, løgtingsmaður, landsstýrismaður, fólkatingsmaður og nú eisini borgarstjóri í Runavík í 10 ár.

Tá hendan býráðssetan er av í 2028, er hann eisini vorðin 73 ára gamalur, um lív og heilsa vilja tað, og hann heldur, at so er stundin komin at siga politikkinum farvæl.

Tórbjørn Jacobsen hevur verið borgarstjóri í Runavík í samfull 13 ár, og tað er nógv tað longsta, nakar hevur havt tað álitisstarvið.