Maskinmeistarafelagið sent fráboðan til kýpriotisku myndugleikarnar

Maskinmeistarafelagið hevur nú sent fráboðan til kýpriotisku sjófartsmyndugleikarnar um hendingina 1. september, tá ferðamannaskipið Galaxy sigldi við opnum hekkuportri um Suðuroyarfjørð.

Formaðurin, Arnfinn Bech, sigur í tíðindaskrivi, at felagið ikki kann góðtaka ein “tað gongur nokk”-hugburð, tá talan er um trygd á sjónum. Hann undrast framvegis á, at Sjóvinnustýrið slepti málinum uttan at tosa við mannin, sum tók myndina, og tí heldur ikki gav løgregluni møguleika at kanna málið.

Formaðurin hevur sjálvur tosað við Jens Sivar Djurhuus, sum tók myndina av opna hekkuportrinum, tá hann - í sambandi við sítt arbeiði - var staddur á bildekkinum á Galaxy á veg úr Havn og suður á Krambatanga um kvøldið tann 1. september.

– Talan er um ein fullkomiliga reiðiligan og álítandi samfelagsborgara, har tað avgjørt ikki er nøkur sum helst orsøk at seta spurnartekn við trúvirðið, og eg fati framvegis ikki, at Sjóvinnustýrið slepti málinum uttan at ómaka sær so mikið sum at tosa við mannin, ið átti myndina og kundi skjalprógva alt – og ikki bara tað, men við tí eisini syrgdi fyri, at politiið heldur ikki kundi kanna málið, sigur Arnfinn Bech.

Málið verður nú eisini tikið upp á fundinum hjá Norðurlendsku Maskinmeistarafeløgunum (NMF) í Malmø, har trygd á sjónum er høvuðsevnið.

– Vit mugu tryggja, at hendingar sum hesar ikki verða tagdar burtur, sigur Arnfinn Bech, formaður í Maskinmeistarafelagnum.