Harmast handfaringina av málinum um fráfaringaraldur

Klaksvíkar kommuna sigur seg nú harmast um, hvussu málið um fráfaringaraldur var handfarið.

Málið var fyri á býráðsfundi 25. september, men var beint aftur í umsitingina at tillaga.

Endamálið við málinum var at skapa eina trygga tilgongd í sambandi við starvsviðurskiftini hjá starvsfólkum, sum nærkast fráfaringaraldri, sigur kommunan á heimasíðuni. 

Men orðingar í tilmælinum elvdu til kjak og ónøgdsemi.

Sum kommuna taka vit ábyrgd av hesum sera óhepnu signalum, sum viðgerðin hevði við sær, og biðja vit um umbering fyri hetta, sigur kommunan eisini.

Vit skilja væl, at starvsfólk kenna seg stoytt av óhepnum orðingum.

Ikki í tráð við hugburðin 

Vit skulu undirstrika, at hesar orðingar ikki eru í tráð við tann hugburð, sum Klaksvíkar kommuna hevur.

Vit hava størstu virðing fyri øllum okkara starvsfólkum, bæði yngri og ikki minst eldri, royndum starvsfólkum, sum bæði eru dugnalig og hava stórt virði fyri sín arbeiðsgevara og hollar royndir og vitan at geva av, sigur kommunan.

Og nú málið aftur er í umsitingini, fara vit at gera okkum ómak við viðgerðini fyri at tryggja starvsfólkunum hjá komununi tryggar, rættvísar og væl skipaðar tilgongdir, sigur kommunan.