Smyril í sigling aftur týsmorgunin

Eftir sjey vikur í dokk á Fayard skipasmiðjuni í Munkebo á Fjóni og umfatandi umbyggingar- og ísetingararbeiði, er Smyril nú á veg til Føroya. 

Tað skrivar SSL í tíðindaskrivi í kvøld.  

 - Stórarbeiðir eru fingin frá hondini. Uppíbygging í afturskipið og íseting av tveimum síðuskrúvum aftan og tríggir nýggir hjálpimotorar, sum eru meira enn tvífalt so máttmiklir sum teir undanfarnu, eru mest týðandi arbeiðini, skrivar SSL.

Arbeiði í samband við 20 ára klassingina er eisini gjørt.

200 fólk knýtt at verkætlanini

Í Munkebo vóru fleiri royndarkoyringar gjørdar av ymsum skipanum umborð.

Skipanir eru tiknar sundir og settar saman aftur, og skuldu fáast at rigga, áðrenn full megi kundi setast á. 

Fólk frá rakstrardeildini á Strandferðsluni og fólk frá Fayard skipaðu stóru verkætlanina, og høvdu upp í 200 fólk knýtt at sær.

24 mans við í dokk

Hægsta talið av arbeiðsfólki í senn umborð var umleið 100. Talið av undirveitarum var umleið tíggju.

Manning av Smyrli, ið var við í dokk, taldi 24 fólk íroknað báðar verkætlanarleiðararnar.

Hin parturin av manningini, tilsamans 32 fólk í vaktum, sigldu við Galaxy. 

Aftur í dokk um trý ár

Í 2028 skal Smyril aftur í dokk, tá ið størsta arbeiðið verður at skifta teir fýra høvuðsmotorarnar.

120 milliónir krónr vóru játtaðar til verkætlanina hesa ferð, íroknað leiguskipið.

Tørvurin á játtan verður áleið sami í 2028, skrivar SSL  

Smyril siglir væntandi sín fyrsta túr av Krambatanga týsmorgunin.